Дзӕуджыхӕуы сывӕллӕтты хоры скъолайы бӕстыхай арӕзт ӕрцыд 50 азӕй фылдӕры размӕ. Бындурон цалцӕг ам никуы уыд. Ныртӕккӕ дзы ӕппӕты зӕронддӕр хай цалцӕг кӕнынц. Кусджытӕ ныридӕгӕн скодтой конструкцитӕ, баивтой уӕлхӕдзар ӕмӕ рудзгуытӕ, стӕй саив кодтой агъуыстытӕ мидæгæй. Проектӕн ӕхцайы фӕрӕзтӕ дӕттынц 2 программӕмӕ гӕсгӕ: муниципалон ӕмӕ федералон. Уый фӕрцы скъолайы бынтондӕр сног кӕндзысты ифтонггарз ӕмӕ интерактивон фӕйнӕджытӕ. Куыстытӕ фӕуынмæ хъавынц октябры. Горӕты администрацийы сӕргълӕууӕг йӕхӕдӕг сбӕрӕг кодта куыстыты цыд. Милдзыхты Вячеслав бабӕрӕг кодта 106-ӕм рӕвдауӕндон дӕр. Сарӕзтой йæ 1939 азы ӕмӕ дзы бындурон цалцӕг рагӕй нæ уыд. Скъолайы агъомæ кусæндоны разамонæг куыд радзырдта, афтӕмӕй иуӕй-иу уатты цар дӕр ӕркалд. Ныртӕккӕ кусджытӕ ивынц доны хӕтӕлтӕ ӕмӕ телтӕ. Сӕйраг куыстытӕ фесты: баивтой уӕлхӕдзар, пъолтӕ, электрон ӕмӕ хъармгӕнӕн системӕтæ. Кӕронмӕ фӕхӕццӕ кӕны 21-ӕм рӕвдауӕндоны бындурон цалцӕг дæр. Ацы бӕстыхай сарӕзтой 1962 азы. Кусджытӕ ныридӕгӕн баивтой рудзгуытӕ ӕмӕ пъолтӕ, хæтæлтæ, телтӕ ӕмӕ гӕрзтӕхсӕн. Ныртӕккӕ хӕдзары сӕры цалцӕг фӕвӕййынц ӕмӕ хæрæндоны вентиляци ӕвӕрынц. Сӕйраг куыстытӕ хъуамæ фӕуой цалдӕр боны фӕстӕ. Сывӕллӕтты рӕвдауӕндон байгом уыдзӕн афоныл. Горӕты администраци иудадзыг бӕрӕг кӕны ӕппӕт объектты цалцӕг. Ӕрмӕст ацы аз Дзӕуджыхъӕуы ног кӕнынц 7 рӕвдауӕндоны. 6-ы цалцӕг дзы фидынц горӕты бюджетӕй. Ноджы ма иу та — федералон программӕмӕ гӕсгӕ.